बुटवल, कार्तिक १८
मणिमुकुन्द सेन उद्यान संरक्षण समितिको १७ औं वार्षिक साधारण सोमबार सम्पन्न भएको छ । देशभरका पार्कहरूको विशिष्टिकरण गर्दै तिनलाई आकर्षक र अध्ययनयोग्य बनाउनेमा सरोकारवालाहरूले जोड दिएका छन् । सामरिक र ऐतिहासिक महत्व बोकेको स्थलहरुको विकास निर्माणमा सबैएकजुट हुनुपर्ने उनीहरुको भनाई छ ।  वक्ताहरूले उद्यानहरूको पहिचान र विशिष्टिकरण गर्न सके पर्यटन प्रवद्र्धनमा ठूलो टेवा पुग्ने धारणा राखे ।

कार्यक्रममा बोल्दै लुम्बिनी प्रदेशका पूर्वमन्त्री भोजप्रसाद श्रेष्ठ र समितिका संरक्षक तथा बुटवल उपमहानगरपालिकाका नगरप्रमुख खेलराज पाण्डेयले संयुक्त रूपमा उद्घाटन गर्नुभयो ।कार्यक्रममा पूर्वमन्त्री श्रेष्ठले अतिक्रमणको चपेटामा रहेका ऐतिहासिक स्थलहरूलाई जोगाउने अभियानमा स्थानीय समुदायको भूमिकालाई प्रशंसा गर्दै मणिमुकुन्द सेन उद्यानको ऐतिहासिक र सामरिक महत्वलाई संरक्षण गर्न निरन्तर प्रयास गर्नुपर्ने बताउनुभयो । उहाँले फुलबारी क्षेत्रको प्रचार–प्रसार र पर्यटन पूर्वाधारमा जोड दिन सुझाव दिनुभयो ।

समितिका संरक्षक तथा नगरप्रमुख पाण्डेयले उद्यानहरूको विकास, संरक्षण र व्यवस्थापनमा स्थानीय सरकार निरन्तर क्रियाशील रहेको उल्लेख गर्नुभयो । उहाँले समितिलाई अध्ययन तथा अनुसन्धान केन्द्रका रूपमा विकास गर्न कार्यविधि बनाएर अघि बढ्ने योजनाबारे जानकारी दिनुभयो । 

समितिका अध्यक्ष माधवप्रसाद नेपालले समितिले विगत वर्षमा दिगोपनाका आधार सुदृढ गर्न, प्रशासनिक दक्षता अभिवृद्धि गर्न, वैकल्पिक आम्दानीका स्रोत सिर्जना गर्न र समुदायसँगको साझेदारीलाई संस्थागत बनाउन उल्लेखनीय प्रगति हासिल गरेको बताउनुभयो ।उहाँका अनुसार मणिमुकुन्द सेन उद्यान धार्मिक सहिष्णुता र सांस्कृतिक सहअस्तित्वको उत्कृष्ट उदाहरण हो । “यो केवल घुमफिरको स्थल मात्र नभई अध्ययन, चिन्तन र आत्मिक अनुभूतिको पवित्र स्थान हो,” उहाँले भन्नुभयो ।

कार्यक्रममा बुटवल उपमहानगरपालिकाका उपप्रमुख साबित्रा देवी अर्याल, राष्ट्रिय उद्यान महासंघ नेपालका अध्यक्ष खेम लुईटेल, समितिका सल्लाहकार निर्मल जिसी र उपाध्यक्ष रमेश नेपाललगायतका वक्ताहरूले पनि पार्कहरूको विविधिकरण र दीगो व्यवस्थापनमा जोड दिनुभयो ।समितिका अनुसार विगत एक वर्षमा मणिमुकुन्द सेन उद्यानमा ५ लाख ४७ हजार १९९ जना पर्यटकले भ्रमण गरेका छन् । तीमध्ये ७४ हजार भारतीय र १७५ जना तेस्रो मुलुकका पर्यटक रहेका छन् । सो अवधिमा उद्यानले ४ करोड १० लाख ३४ हजार रुपैयाँ आम्दानी गरेको छ । समितिमा हाल ६०१ सदस्य आवद्ध छन् ।