बुटवल, माघ २८
रुपन्देही क्षेत्र नं– २ का प्रतिनिधि सभाका युवा उम्मेदवार सुवास पाण्डे ‘विश्वदीप’ले आम जनताले जीवनमा महसुस हुनेगरी विकास चाहेकाले त्यसका निम्ति आफूले व्यवहारमा देखिने गरी काम गर्ने संकल्प गर्नुभएको छ । आफ्ना निर्वाचन क्षेत्रका जनतासंगको भेटघाट र अन्र्तक्रियाका क्रममा उहाले जनताका विभिन्न जिज्ञासा मेटाउदै परिवर्तन कागजमा नभई व्यवहारमा देखिने गरी ल्याउन आफू प्रतिवद्ध रहेको बताउनुभयो ।

दैनिक जनताका गुनासा सुन्दै घरदैलोमा हिडेका उम्मेदवार विश्वदीपले अबका दिनमा ढाटेर आफ्नो दुनो सोझाउने ठगमाराहरु बिगतमा सांसद र मन्त्री बने पनि अब बेलैमा चिनेर यसपटकको चुनावमा किनारा लगाउनुपर्ने आवश्यकतामा जोड दिनुभयो । 

जनताको आवश्यकता र चाहना आफूले राम्रोसंग बुझेको बताउँदै रुपन्देही क्षेत्र नं– २ का उम्मेदवार पाण्डेले नेपालमै सम्मानजनक रोजगारीको अवसर सिर्जना गर्न सक्नेगरी काम गनुपर्ने चुनौती देशमा विद्यमान रहेको बताउनुभयो  । 

घरदैलोका क्रममा उहाले आफू कुनै छलकपट नगरी युवा पुस्ताको ऊर्जा, नयाँ सोच र स्पष्ट विचारका साथ परिणाममुखी राजनीति गर्न दृढतापूर्वक लाग्ने विश्वास मतदातालाई दिलाउनुभएको छ  । उम्मेदवार पाण्डेले भावी पुस्ताको भविश्य हेरेर देशको  समृद्धि र परिवारको खुसी सुनिश्चित गर्ने महत्वपूर्ण अवसरको रुपमा फागु २१ गतेको चुनावलाई लिनुपर्ने समेत बताउनुभएको छ ।
 

रुपन्देही क्षेत्र नं २ का बुटवल उपमहानगरपालिकाका १ देखि १३ नं सम्मका वडा, तिलोत्तमाका १ देखि ६ नं सम्मका वडा र सैनामैनाका १ देखि ४ नं सम्मका वडामा नेकपाका नेता कार्यकर्ता र उम्मेदवार सहभागी भएर घरदैलो अभियान जारी राखेका छन।