बुटवल,फागुन १४
बुटवलको सुप्रिम सहकारी पीडितहरु यति शिथिल भएका छन् कि, अब रकम फिर्ता माग्यो भने गाली गलौजको डरले खुलेर बोल्न चाहँदैनन् । बुटवलका एक जना जल्दाबन्दा व्यवसायी जसले सुप्रिम सहकारीमा बचत गरेको ३५ लाख बढी रकम गुमाउनु पर्यो । तर उहाले अचेल उक्त विषयमा बोल्न चाहानुहुन्न।

‘धेरै नेता गुहारियो, सरकारलाई गुहारियो, बोलेर थाकियो अब शान्त बस्नुनै ठिक ।’–सहकारी गठीमा पर्नुभएका व्यवसायीले सञ्चारकर्मीहरुसँग समेत अनकनाउँदै भन्नुभयो, ‘अहिले त आफूले पाउनु पर्ने सहकारीको रकम माग्न पनि सामाजिक बहिस्कारमा पर्ने हो कि भन्ने डर पो छ, त्यसैले मेरो नाम उल्लेख नगर्नुहोला ।’ बुटवलको सुप्रिम सहकारीको रकम अपचलन गरेको मुद्दामा सहकारीका अध्यक्ष ओम गुरुङ अहिले भैरहवास्थित कारागारमा छन् भने उक्त मुद्दामा मुसिएका रवि लामिछाने चुनावमा भोट माग्दै पूर्व–पश्चिम देश दौडाहामा व्यस्त हुनुहुन्छ । राष्ट्रिय स्वतन्त्र पार्टी (रास्वपा) सभापति लामिछानेसँग जोडिएको सुप्रिम सहकारीका पीडितले यस बारेमा सामाजिक सञ्जालमा केही लेखे वा बोलेमा सिङ्गो समाज नै उनीहरुमाथि खनिने डरले प्राय बोल्न चाहँदैनन् । 

बुटवलमा गठन भएको सहकारी पीडित संघर्ष समितिका संयोजक विजय नेपालका अनुसार यही फागुन २१ गते हुने प्रतिनिधिसभा सदस्यको चिर्वाचनमा उम्मेदवार भएका हरेक नेताहरुलाई ध्यानाकर्षण गराइएको छ । सहकारीको रकम फिर्ता माग्दै नेकपा एमालेका उपाध्यक्ष विष्णु पौडेल, नेपाली काँग्रेसका नेता चुन्नप्रसाद पौडेल, एमाले नेता बासुदेव घिमिरे, राप्रपाका उम्मेदवार गौरव बोहोरा, नेपाली कम्युनिष्ट पार्टीका उम्मेदवार विश्वदिप पाण्डेय लगायतका नेताहरुलाई समितिले ध्यानाकर्षण पत्र बुझाईसकेको छ ।

यति मात्र होइन सहकारी ठगी मुद्दामा जोडिएका रवि लामिछानेको पार्टी रास्वपाका तर्फबाट रुपन्देहीमा उम्मेदवार बनेका सुलभ खरेल, लेखजंग थापा लगायतलाई समेत समितिले ध्यानाकर्षण पत्र बुझाएको नेपाल बताउनुहुन्छ  सहकारीको रकम फिर्ताको विषयमा रास्वपा उम्मेदवार खरेलले अहिले फागुन २१ सम्म निर्वाचनमा व्यस्त भएको र त्यसपछि मात्रै पहल गर्ने टालटुले जवाफ दिएर पीडितहरुलाई फर्काउने गर्नुभएको छ । 

सहकारी ठगीको अभियोगमा पुर्पक्षका लागि थुनामा रहेका लामिछानेले २ करोड ७४ लाख ८४ हजार विगो दाखिल गरेर अहिले बाहिर छन् । यद्यपी मुद्दाको छिनोफानो लाग्नैछ । रविविरुद्ध कास्की, काठमाडौं, चितवन र पर्सा जिल्ला अदालतमा पनि सहकारी ठगी तथा संगठित अपराधसम्बन्धी मुद्दा विचाराधीन नै छन्। 

तिलोत्तमाको शंकरनगर बस्ने ५५ वर्षीय भेषराज पौडेलले आफूसहित परिवारका ४ जनाले गरेको बचत सहकारीमै विलय भएपछि बचत फिर्ता पाउने आशा करिव सकिएको गुनासो गर्नुभयो । रोजगारका लागि भारतमा गएर जीवनभर कमाएको रकम उनले सहकारीमा बचत गर्नुभएको थियो  । हाल सेवानिवृत्त जीवन बिताइरहेका उहाले परिवारका अन्य ३ सहित ३३ लाख बढी रकम सहकारीमा जम्मा गर्नुभएको थियो । ‘सहकारीको रकम फिर्ता गराउनका लागि रास्वपा उम्मेदवार सुलभ खरेलाई पनि भेटेर भनियो। उहाँले त उल्टै आश्चार्य मानेजस्तो, डराए जस्तो कुरा गरेर टाढिनु भयो ।’–पौडेलले भन्नुभयो, आखिर हामीले जीवनभर खाइनखाई बचत गरेको पैसा पाउने आशा गुमिसक्यो । 

तिलोत्तमाको ड्राइभरटोलमा डेरी व्यवसाय गरेर बस्नुभएकी विमला शर्माले सहकारीमा बचत गरेको ४२ लाख बढी रकम फिर्ता पाउनुभएको छैन् । रकम फिर्ता माग्दै विभिन्न आन्दोलन तथा विरोध कार्यक्रममा सहभागी भए पनि फिर्ता हुनै कुनै संकेत नदेखिएको गुनासो गर्दै उहाँले अब पनि न्याय पाउनेमा आशा मरिसकेको निराशा सुनाउनुभयो । 

सुप्रिम सहकारी गठी प्रकरणमा लाखौं रकम गुमाएका बचतकर्ता अहिले उक्त विषयमा खुलेर बोल्न पनि चाहाँदैनन् । मुलुक प्रतिनिधिसभा निर्वाचनमा होमिएको छ। दल तथा दलका नेताहरुको आ–आफ्नै चुनावी प्रतिवद्धताहरु छन्, तर सहकारी पीडितहरुको माग पुरा गर्ने संकेत भने कसैले नदेखाएको उनीहरुको गुनासो छ । सहकारी ठगी प्रकरणमा मुछिएका व्यक्ती नै राजनीतिक शक्तिको आडमा भोट माग्दै हिँड्दा उनीहरु विरुद्ध बोले उल्टै समाजमा नराम्रो हुने र पीडितहरुको डर छ । सामाजिक सञ्जालहरुमा आउने अभद्र र अश्लिल गालीगलोजको डरले पनि उनीहरु अचेल खुलेर बोल्न रुचाउँदैनन् ।